رفعت صوتى بشكوى منى لربنا

رفعت صوتى بشكوى منى لربنا
قولتله:يارب انا جاية اتظلم وارفعلك امرنا
يا ترى انت راضى عن حالنا؟؟ولا بسماح منك اللى بيحصل لنا؟
فين حق الدم الطاهر اللى سال على ارضنا ؟
احنا استغثنا..وصرخنا بأعلا الصوت ..لكن ولا حد دارى بنا
عايشين فى عذاب ومرار ولا حد حاسس بغلبنا
احلام بريئة ماتت فلحظة غدر من بنادق قتلت فرحنا
على يد مجرم محترف كل همه يفرق شملنا
وايه بس كان ذنب الملايكة اللى رحلو للأبد عننا؟
من غير حتى كلمة وداع ولا اى نظرة حنينة
وحشونا بجد الولاد وغيابهم مش بالساهل على اللى زينا
ارجوك يارب احكم بعدلك ..وطبب جراح قلبنا
عايزين نعيش فى امان جوة بيوتنا مع اهلنا
عايزين بلدنا تحضنا وترجع لينا حقنا
وحق دم اخواتنا ..واخوات كل واحد مننا
ولازم كل مجرم يتعاقب
وكل قاتل يتحاسب
ساعتها بس...هيعم السلام على ارضنا
وهنعيش فى امان...والحب هينور قلبنا

كلمات:شاعرة الشهداء
ناهد فاروق شاروبيم