من دمعة سايلة.

من دمعة سايلة.... على خد شريد
وصرخة طالعة.....من وسط عذاب وتنهيد
لتعذية وفرحة........ولفخر اكيد
ايوة طبعا ...........دى ام الشهيد

تستاهلى التكريم يا أمى بجد
ياللى احتمالك....... فاااااق الحد
دا لو جبل مكانك ...كان زمانه اتهد
لكن صبرك واحتملك...كانو اقوى واعظم رد

خلاص امسحى دموعك يا راحيل
واوعى تبلى تانى مناديل
دا ابنك فى السما.... ملاك جميل
ولابس على راسه.... اجمل اكاليل

ابنك فى السما فرحان يا هناه
دا فحضن الست العدرا وكل الشهدا معاه
من حقك تفرحى..دا مكانه كلنا بنحلم بيه وبنتمناه
اصل الشهيد ده اكليله مضمون عند الله

كل سنة وانتى طيبة يا أمى
ياللى حبك بيجرى فدمى
انتى اللى دايما شايلة همى
ومين غيرك يقدر يشيله يا أمى؟؟؟

ولا كل القلوب ...زى حنان قلبك
ولا فى حب ....زى حبك
انتى اول من وصانى عليه ربى وربك
انتى ملاك من السما..اصل السماحة والمحبة هما طبعك

نفسى احضنك وابوس على ايديكى
واجمع كل عبارات المحبة اللى تليق بيكى
سلام يا أمى ..انا من كل قلبى بحييكى
ودة مش كلامى انا...دى رسالة من ابنك الشهيد ليكى

يا أمى النهاردة عيدك ..وانا عايزك تعيدى
وعن الدموع و الاحزان ...أرجوكى ابعدى
وخلى عندك ثقة فى وعود ربنا واوعى تترددى
انا عايش سعيد فى السما ..وبكرة هتشوفينى وهتتأكدى

من كلمات:شاعرة الشهداء
ناهد فاروق شاروبيم
تحية رقيقة منى لكل ام شهيد وكل سنة وانتى طيبة يا أمى